Ég var klukkaður

Ég var klukkaður, mér algjörlega að óvörum (skammastín, Gréta ). Hér koma 8 atriði um mig sem eru á fárra vitorði (reyndar er ég sem betur fer almennt séð á fárra vitorði):

1. Eitt sinn í æsku féll ég niður þverhnípt bjarg um 8 metra hæð en lenti í vírneti í gömlum heyvagni og lifði það af.
2. Ég sat 6 ára gamall hest sem fældist, ég flaug af baki og brotnaði svo illa á olnboga að hefði dr. Snorri Hallgrímsson ekki verið læknir á Landspítalanum væri ég nú einhentur.
3. Ég var í sveit í Hamragörðum undir Eyjafjöllum og byrjaði þar að reykja 9 ára gamall. Ég hætti reyndar fljótlega aftur – í bili.
4. Ég var sumarmaður á Gunnarholtshælinu í 3 ár og þegar ég eignaðist norska kærustu skildi hún ekkert í því að allir rónar bæjarins þekktu mig með gælunafni.
5. Ég seldi byssuna mína í Þrándheimi og frétti fyrst síðar að þriggja skota haglabyssur væru bannaðar í því landi svo ég hef smyglað ólöglegu vopni til Noregs.
6. Ólína Þorvarðardóttir ritskoðaði einu sinni texta eftir mig sem átti að flytja á 1. desember skemmtun í Háskólabíói.
7. Ég hef gengið frá Evrópu til Asíu yfir fljótið Ob á ís við heimskautsbaug.
8. Ég þarf að fara til Ungverjalands og herma loforð upp á konu sem vill gera mig að heiðursfélaga ungversku bútasaumssamtakanna.

Athugasemdir

[Greta Björg Úlfsdóttir, 13.10.2007 kl. 10:02]

Þú hefur greinilega ekki verið feigur, Matthías G.!

Þetta er glæsileg upptalning hjá þér. Hvað varstu að þvælast þarna við heimskautsbauginn? 

[Ár & síð, 13.10.2007 kl. 11:52]

Ég var fararstjóri lítils hóps íslenskra unglinga á alþjóðamótið Children of The Arctic í Vorkúta og Salekhard (áður Obdorsk). Við fararstjórarnir fórum t.d. fyrstir Vesturlandabúa (a.m.k. sem frjálsir menn) niður í kolanámurnar miklu við Vorkúta og það var sko lífsreynsla.