Áróðursstríðið tapast alltaf

Gideon Lichfield hefur lengi verið blaðamaður The Economist í Jerúsalem og veltir því fyrir sér í þessari afbragðsgóðu grein hvers vegna Ísraelsmenn geti ekki unnið áróðursstríð sín, þrátt fyrir yfirburðafærni í almannatengslum. Málið er að þeir eru alltaf að reyna að svara rangri spurningu: Hvers vegna er þetta réttlætanlegt?" Umheimurinn vill hins vegar vita hvernig einmitt þessi árás, þetta stríð, þessi fjöldamorð bæti stöðu mála á svæðinu og vísi í framtíðarátt. Og við þeim spurningum hafa þeir engin svör.

Því má líka bæta við að umheimurinn hefur það oft staðið Ísraelsher að lygum að hann er alltaf grunaður um græsku. Gott dæmi eru viðbrögðin eftir árásina á skólann þar sem fólki hafði verið ráðlagt að leita skjóls. Fyrst var sagt að Hamas hefði skotið sprengjum þaðan og dregnar fram myndir því til sönnunar (að vísu gamlar!) og svo var skýringum breytt eftir því sem fleira kom fram af óhrekjanlegum staðreyndum. Nýjasta útskýringin er að tæknibilun hjá tæknilega háþróaðasta her heims, sem hefur undirbúið þessa innrás af kostgæfni í hálft annað ár, sé ástæðan. Og enn efumst við...

 

Tæknibilun sögð hafa valdið árás á skóla

Athugasemdir

[Hjálmtýr V Heiðdal, 11.1.2009 kl. 12:10]

Tæknibilun var líka skýringin þegar Ísraelsher þurrkaði út heila fjölskyldu (19 manns minnir mig) í Beit Hanoun í fyrra. Þeir bera við mistökum og tæknibilunum þegar sönnunargögnin eru svo sterk að þeim tekst ekki að ljúga framan í heiminn. Lygamaskínan er hluti af hernaðarmaskínunni. Hún virkar á suma eins og við vitum. Það er líka einkenni á málsvörum síonistanna, t.d. Vilhjálmi Erni í Kbh, að þeir leggja mikla áherslu á upplýsingar um að Hamasliðar hafi verið í skólum að skjóta og því eðlilegt að sprengja skólann í tætlur með öllu innanborðs. Svo þegar líkin hrannast upp, og upplýsungar koma um að engir Hamasliðar voru í viðkomandi skóla, þá bregða þeir upp myndum af Ísraelskum börnum sem hafa látist í átökunum. Þá eru þeir að leggja áherslu á hefndarmómentið sem er svo ríkt hjá þeim sem ganga lífsins veg með vissa bókleppa fyrir augunum.

[Dunni, 11.1.2009 kl. 12:24]

Sínum augum lítur hver réttlætið, nema Ísralesmenn. Þeir sjá ekki réttlætið og því síður óréttlætið sem þeir hafa ræktað í kringum sig.

Það var svolítið spugilegt að heyra sendiherra Ísraels í Noregi að dásama tæknikunnáttu þjóðar sinnar sem svo fremur fjöldamorð vegna tæknibilunnar.